村屋上網唔一定貴 教你至抵玩法

好多人覺得村屋上網貴，因為無幾多間網絡供應商揀。幾百蚊月費，再加幾百蚊安裝費都焗住要裝，真係幾肉赤。但其實今時今日，科技咁發達，又點會無辦法平玩呢，就係用4G網絡變家居網絡。

免費試玩方案

將4G網絡變家居網絡嘅好處係，唔使合約唔使安裝費，可以先試玩，玩過啱玩再慢慢upgrade──因為必要裝備就只係差唔多每個人都有嘅智能手機同網絡數據。用法好簡單，只要開啟電話嘅tethering功能，再將要上網嘅裝置接駁到tethering分享出嚟Wi-Fi，就有得試玩。iPhone用戶喺設定度打開個人熱點就得，Android都有呢個功能，不過就要睇手機型號嚟設定。

呢個簡單方法只係試玩版，好用都唔好長用，因為流動數據貴，但覺得好玩，就可以按下面方法慢慢upgrade。

月費低至100蚊唔駛

然後就係去鴨記買張4G儲值卡返嚟試。唔好以為4G卡一定貴，其實有啲98蚊已經有30日4G用量，鴨記買往往仲有得平。嚟到呢個階段，就係試下「公平用量」夠唔夠用，若果唔係日煲晚煲劇集、BT，一般上網睇吓嘢，數據用量唔會太大嘅。不過邊個plan平，幾時有平plan，就要隨時開格價精明眼喇。

插Sim卡Router 24天候WiFi

用電話分享WiFi，有個唔好處係電話要跟身，你出咗街屋企人就無得上網。解決方法有三個，最簡單就係：1)用舊電話長時間分享網絡(今時今日好多人都有幾部電話啦！)；2)買部可以插sim卡嘅 router，再由Router將4G分享成WiFi。可插sim卡嘅 router一般都唔貴，淘寶好多百零蚊嘅，想用靚啲，TP-Link M7350都只係600蚊唔駛；3) 如你本身已經有router，而且個router支援 4G USB，就價錢就仲可以平啲，只要買一隻4G手指插入個USB router就搞掂。