越嚟越多樓唔畀養狗，有花園嘅村屋就變咗唔少愛狗人仕嘅好選擇。大大個花園，最啱狗狗消耗體力，
唔會變癡肥，健健康康。但點樣令花園變得啱狗狗玩，其實都幾考心思！
–給牠一個家–
好多人都知狗狗唔中意入籠，不過狹小空間其實亦為狗狗提供安全感，係放鬆休息嘅好地方。
喺花園安放一個小狗屋，平時喺狗屋餵食，同埋唔好成日閂門困住佢，咁狗狗就會慢慢習慣狗屋。
如果喺狗屋加多條樓梯同「天台」就仲好，狗狗想曬太陽時，多個地方爬上去，點會唔中意呢？
–唔係警犬都要巡邏–
狗狗天生就有地盤意識，同中意巡視地盤，花園夠大就不妨製作一條小徑，等狗狗發揮佢守護者嘅天性！
–加狗窗滿足好奇心–
狗狗天生仲好好奇，嗅到圍牆外面傳咗陣味，聽到唔知腳步之類嘅聲，但又畀圍牆隔絕外面世界，
就好似人電話無電，但身邊個個喺度玩電話，周身唔自在，與世隔絕咁。有機會設計圍牆嘅話，
就可以考慮吓狗狗嘅安全同視野。狗窗(dog fence window)係個唔錯嘅選擇。
–狗狗易用泳池–
有泳池但狗狗怕水？有呢條梯，初學游水嘅狗狗就可以好安全安心咁用游池喇！
但狗狗仲唔肯落水？與其同狗狗鬥智鬥力，或者請人教，
不如出呢招令狗狗自己學啦(心急可以直接1:15開始睇)：
–DIY自動補充水兜–
活動空間大，體力消耗就多，狗狗都需要補水。但一個碗嘅水夠唔夠飲呢？不如DIY整個自動補充水兜，
一隻碗、一個汽水樽、一個架，同埋十二蚊店嘅魔術貼，就有排飲，係咪好易呢？